Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 58.1 | Dem. 58.3 (English) | >>Dem. 58.6 |
58.1τοῦ πατρὸς ἡμῶν , ὦ ἄνδρες δικασταί , διὰ τουτονὶ Θεοκρίνην ἀτυχήσαντος πρὸς τὴν πόλιν καὶ ὀφλόντος δέκα τάλαντα , καὶ τούτου διπλοῦ γεγενημένου ὥστε μηδʼ ἐλπίδα ἡμῖν εἶναι σωτηρίας μηδεμίαν , ἡγησάμην δεῖν ἐπὶ τῷ τιμωρεῖσθαι μεθʼ ὑμῶν τοῦτον μήτε ἡλικίαν μήτε ἄλλο μηδὲν ὑπολογισάμενος δοῦναι τὴν ἔνδειξιν ταύτην .
58.2καὶ γὰρ ὁ πατήρ , ὦ ἄνδρες δικασταί , ᾧπερ πάντα πειθόμενος πεποίηκα , πρὸς ἅπαντας ὠδύρετο τοὺς γνωρίμους , εἰ παραλιπὼν ἐγὼ τὸν καιρὸν ἐν ᾧ διὰ τὸ τὸν πατέρα ζῆν ἔξεστί μοι τοῦτον ἀμύνασθαι , τὴν ἀπειρίαν καὶ τὴν ἡλικίαν προφασιζόμενος αὐτὸν μὲν περιόψομαι πάντων ἀπεστερημένον , Θεοκρίνην δὲ παρὰ τοὺς νόμους γραφὰς γραφόμενον καὶ συκοφαντοῦντα πολλοὺς τῶν πολιτῶν , οὐκ ἐξὸν αὐτῷ .
58.3δέομαι οὖν ὑμῶν ἁπάντων , ὦ ἄνδρες Ἀθηναῖοι , καὶ ἱκετεύω μετʼ εὐνοίας ἀκοῦσαί μου , πρῶτον μὲν ὅτι τῷ πατρὶ βοηθῶν καὶ πειθόμενος ἀγωνίζομαι , ἔπειθʼ ὅτι καὶ νέος ὢν καὶ ἄπειρος , ὥστʼ ἀγαπητὸν εἶναί μοι , ἐὰν ὑπαρξάσης τῆς παρʼ ὑμῶν εὐνοίας δυνηθῶ δηλῶσαι τὰ πεπραγμένα τούτῳ ·
58.4πρὸς δὲ τούτοις , ὅτι , ὦ ἄνδρες δικασταί , προδέδομαι (τὰ γὰρ ἀληθῆ πρὸς ὑμᾶς εἰρήσεται ) ὑπʼ ἀνθρώπων , οἳ πιστευθέντες ὑφʼ ἡμῶν διὰ τὴν πρὸς τοῦτον ἔχθραν , καὶ πυθόμενοι τὰ πράγματα καὶ φήσαντες ἐμοὶ συναγωνιεῖσθαι , ἐγκαταλελοίπασι νυνί με καὶ διαλέλυνται πρὸς τοῦτον ἐν τοῖς ἐμοῖς πράγμασιν , ὥστε μοι μηδὲ τὸν συνεροῦντʼ εἶναι , ἐὰν μή τις ἄρα τῶν οἰκείων βοηθήσῃ .
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 58.1 | Dem. 58.3 (English) | >>Dem. 58.6 |